O trimarán «Zamná», en Baiona

O trimarán «Zamná», máis coñecido como «Barco da paz», recalou onte na vila de Baiona no seu periplo desde México, onde foi construído, ata Grecia. O organizador da expedición é o coñecido mariñeiro cántabro Vital Alsar, e a súa finalidade é difundir a idea da paz e os seus valores por todo o mundo.
O Zamná foi botado o 25 de agosto no porto de Alvarado, Veracruz. A nave partiu desde Cozumel, para facer escala en Miami, e seguidamente en Nova York, onde participou nos actos en homenaxe ás vítimas do 11 de setembro.
Partiu cara a Europa, e o pasado sábado 3 de outubro chegou a Santander, primeiro destino no vello continente. Despois recalou en San Vicente de la Barquera, e agora en Baiona, para despois tocar Palos de la Frontera, Valencia, Barcelona, Palma de Mallorca, Ostia (Italia) e O Pireo (Grecia). é unha nave que consta de tres corpos, un principal de 35 metros de eslora e 13 metros de manga, e dous botes accesorios que van a babor e a estribor. Conta con sete velas, e tres mastros de 21 metros de altura. O trimarán percorrerá en total 15.768 millas mariñas.